லேட்டஸ்ட் செய்திகள்

தனது ஓய்வுக்கான காலம் வெகுதொலைவில் இல்லை என்று கருதுவதாக அர்ஜென்டினா கால்பந்து அணியின் கேப்டன் லியோனல் மெஸ்ஸி கூறியுள்ளார். கத்தாரில் கடந்த ஆண்டு டிசம்பர் மாதம் நடந்த உலகக் கோப்பை கால்பந்து போட்டியில் அர்ஜென்டினா அணிக்கு தலைமை தாங்கி கோப்பையை வென்று கொடுத்த லயோனல் மெஸ்சி கடந்த ஜூன் மாதம் பிரான்சின் பி.எஸ்.ஜி. கிளப்பில் இருந்து விலகி அமெரிக்காவை சேர்ந்த இண்டர் மியாமி கிளப்பில் இணைந்தார். மேஜர் லீக் போட்டியில் வருகிற 21-ந் தேதி நடைபெறும் ஆட்டத்தில் இண்டர் மியாமி அணிக்காக களம் இறங்க அமெரிக்கா சென்றுள்ள 36 வயது மெஸ்சி அர்ஜென்டினா டெலிவிஷனுக்கு அளித்த ஒரு பேட்டியில், எனது வயதை கணக்கில் கொண்டால் இன்னும் எத்தனை நாட்கள் அர்ஜென்டினா அணிக்காக தொடர்ந்து விளையாட முடியும் என்பது தெரியவில்லை. எனது ஓய்வுக்கான காலம் வெகுதொலைவில் இல்லை என்று கருதுகிறேன். எனது ஓய்வுக்கான தருணம் எப்போது வரும் என்பது துல்லியமாக தெரியவில்லை. எல்லாவற்றையும் சாதித்து விட்ட நான் தற்போது ஒவ்வொரு நாளையும் மகிழ்ச்சியுடன் அனுபவிக்கிறேன்' என்றார்.

கிரிக்கெட் மட்டுமே சிறந்த விளையாட்டு என்று இல்லை. ஹாக்கி போன்ற மற்ற விளையாட்டுகளுக்கும் அரசு முக்கியத்துவம் கொடுக்கிறது என்று அமைச்சர் உதயநிதி ஸ்டாலின் தெரிவித்துள்ளார். சென்னையில் 16 ஆண்டுகளுக்கு பிறகு ஆசிய ஹாக்கி சாம்பியன்ஷிப் போட்டி ஆகஸ்ட் 3 முதல் 12 வரை சென்னை எழும்பூரில் உள்ள மேயர் ராதாகிருஷ்ணன் ஸ்டேடியத்தில் நடைபெற உள்ளது. இதில் ஜப்பான், மலேசியா, பாகிஸ்தான், சீனா, தென் கொரியா மற்றும் இந்தியா ஆகிய 6 நாடுகள் இந்த போட்டியில் பங்கேற்க உள்ளனர். ஆசிய ஹாக்கி போட்டிக்கான கோப்பை மற்றும் சின்னம் அறிமுகம் நிகழ்ச்சி சென்னை மெரினா கடற்கரை கலங்கரை விளக்கம் அருகே நடைபெற்றது. அமைச்சர் உதயநிதி ஸ்டாலின் கோப்பை மற்றும் சின்னத்தை அறிமுகப்படுத்தி கோப்பையினை மாவட்டங்கள் தோறும் கொண்டு செல்லும் பாஸ் தி பால் பேருந்தையும் தொடங்கி வைத்தார். நிகழ்ச்சியில் ஆசிய மற்றும் இந்திய ஹாக்கி அணியின் நிர்வாகிகள் பங்கேற்றனர். பின்னர் செய்தியாளர்களிடம் அவர் பேசியாதவது, சில மாதங்களுக்கு முன்பு ஒடிசாவில் ஹாக்கி உலகக் கோப்பை போட்டி நடைபெற்ற போது நேரில் சென்று பார்வையிட்டிருந்தேன். அப்போது சென்னையிலும் சிறந்த ஹாக்கி மைதானம் உள்ளது. சென்னையில் சர்வதேச போட்டி நடத்த வேண்டும் என்று கோரிக்கை வைத்தோம். அதன் அடிப்படையில் ஆசிய ஹாக்கி போட்டி சென்னையில் நடைபெற உள்ளது. கிரிக்கெட் மட்டுமே சிறந்த விளையாட்டு என்று இல்லை. ஹாக்கி போன்ற மற்ற விளையாட்டுகளுக்கும் அரசு முக்கியத்துவம் கொடுத்து வருகிறது. ஆஸ்கார் விருது வென்ற தி எலிபென்ட் விஸ்பெரர்ஸ் படத்தில் இடம் பெற்றுள்ள பொம்மன்-க்கு அங்கீகாரம் கொடுக்கும் வகையில் லோகோவில் பொம்மனுடன் யானை இடம்பெற்றுள்ளது. பாகிஸ்தான் வீரர்களும் வர இருப்பதால் பாதுகாப்பு ஏற்பாடுகளில் கவனம் செலுத்துவோம். முதலமைச்சர் கோப்பைக்காண மாநில விளையாட்டுப் போட்டியில் முறைகேடு நடக்கவில்லை சிலம்பம் போட்டியில் பங்கேற்ற ஒரு வீரர் மட்டும் குற்றச்சாட்டை முன் வைத்தார். விசாரித்த போது குற்றச்சாட்டு உண்மை இல்லை. அந்த வீரர் தோல்வியின் காரணமாக குற்றச்சாட்டை முன் வைத்திருப்பது தெரியவந்தது. முதலமைச்சர் கோப்பை போட்டியில் முறைகேடு நடக்கவில்லை. இவ்வாறு அமைச்சர் உதயநிதி ஸ்டாலின் தெரிவித்தார்..

விம்பிள்டன் டென்னிஸ் தொடரில் ஆண்கள் இரட்டையர் பிரிவில் இந்தியாவின் போபண்ணா ஜோடி அரை இறுதிச்சுற்றுக்கு முன்னேறி உள்ளது.  கிராண்ட்ஸ்லாம் போட்டிகளில் ஒன்றான விம்பிள்டன் டென்னிஸ் தொடர் லண்டனில் நடந்து வருகிறது. இதில் நேற்று நடைபெற்ற இரட்டையர் கால்இறுதியில் இந்தியாவின் ரோகன் போபண்ணா, ஆஸ்திரேலியாவின் மேத்யூ எப்டென் ஜோடி 6-7(3-7), 7-5, 6-2 என்ற செட் கணக்கில் நெதர்லாந்தின் கிரிக்ஸ்பூர்- பார்ட் ஸ்டீவன்ஸ் இணையை தோற்கடித்து அரைஇறுதிக்குள் நுழைந்தது. 43 வயதான போபண்ணா விம்பிள்டனில் அரைஇறுதியை எட்டுவது இது 3-வது முறையாகும். பெண்கள் ஒற்றையர் பிரிவில் நேற்று நடந்த கால்இறுதி ஆட்டம் ஒன்றில் 2-ம் நிலை வீராங்கனையும், ஆஸ்திரேலிய ஓபன் சாம்பியனுமான அரினா சபலென்கா ( பெலாரஸ்) 6-2, 6-4 என்ற நேர் செட்டில் அமெரிக்காவின் மேடிசன் கீஸ்சை வீழ்த்தினார் . இன்னொரு கால்இறுதியில் 6-ம் நிலை வீராங்கனை ஆன்ஸ் ஜாபியர் (துனிசியா) சரிவில் இருந்து மீண்டு வந்து 6-7 (5-7), 6-4, 6-1 என்ற செட் கணக்கில் நடப்பு சாம்பியனும், தரவரிசையில் 3-வது இடத்தில் உள்ளவருமான எலினா ரைபகினாவுக்கு (கஜகஸ்தான்) அதிர்ச்சி அளித்தார். இதன் மூலம் கடந்த ஆண்டு விம்பிள்டன் இறுதி ஆட்டத்தில ரைபகினாவிடம் அடைந்த தோல்விக்கு ஜாபியர் பழிதீர்த்துக் கொண்டார். ஜாபியர் அரைஇறுதியில் சபலென்காவை இன்று சந்திக்கிறார். மற்றொரு அரைஇறுதியில் ஸ்விடோலினா(உக்ரைன்)- வோன்ட்ரோசோவா (செக்குடியரசு) மோதுகிறார்கள். போட்டியில் தரவரிசையில் 3-வது இடம் வகிக்கும் ரஷியாவின் டேனில் மெத்வதேவ், அமெரிக்காவின் கிறிஸ்டோபர் யுபங்குடன் மோதினார். இதில் மெத்வதேவ் முதல் செட்டை வென்றார். சுதாரித்துக் கொண்ட யுபங் அடுத்த 2 செட்களையும் கைப்பற்றினார். இதற்கு பதிலடி கொடுக்கும் விதமாக 4, 5வது செட்களை மெத்வதேவ் வென்றார். இறுதியில் மெத்வதேவ் 6-4, 1-6, 4-6, 7-6 (7-4), 6-1 என்ற செட் கணக்கில் வென்று அரையிறுதிக்கு முன்னேறினார். மற்றொரு காலிறுதி ஆட்டத்தில் ஸ்பெயின் வீரர் கார்லோஸ் அல்காரஸ், டென்மார்க் வீரர் ஹோல்ஜர் ரூனேவுடன் மோதினார். இதில் அல்காரஸ் 7-6 (7-3), 6-4, 6-4 என்ற செட் கணக்கில் வென்று அரையிறுதி சுற்றுக்கு முன்னேறினார்..