அஸ்வினுக்கு இதுதான் வீக்னெஸ், இதை சரி செஞ்சா போதும், சரியாகி விடுவார் - டிப்ஸ் கொடுக்கும் இந்திய சுழற்பந்து வீச்சாளர் ஓஜா

அஸ்வினின் வீக்னஸ் இதுதான் என இந்திய சுழற் பந்துவீச்சாளர்  பிரக்யான் ஓஜா பேசியுள்ளார்.

இந்திய அணியின் நட்சத்திர சுழற்பந்து வீச்சாளர் ரவிச்சந்திரன் அஸ்வின் 2011ஆம் ஆண்டில், அருண் ஜெட்லி மைதானத்தில் நடைபெற்ற மேற்கிந்தியத் தீவுகளுக்கு எதிரான டெஸ்ட் போட்டியில் அறிமுகமானார். அறிமுகமான முதல் போட்டியிலேயே 9 விக்கெட்களை கைப்பற்றி ஆட்ட நாயகன் விருதினை கைப்பற்றினார். அறிமுக டெஸ்டில் ஆட்ட நாயகன் விருதினை வென்ற மூன்றாவது இந்தியராக அவர் திகழ்ந்தார். அத்தொடரில் மட்டும் அஸ்வின் 22 விக்கெட்களை சாய்த்து, தொடர் நாயகன் விருதினையும் தட்டிச்சென்றார்.

டெஸ்ட் கிரிக்கெட்டில் அறிமுகமானப் பின், இரண்டு வருடங்கள் கழித்து, 18 போட்டிகளில் 100 விக்கெட்களை கைப்பற்றி, அதிவிரைவாக இந்த சாதனையை செய்த இந்தியர் ஆனார். 2016ஆம் ஆண்டில் இந்திய அணிக்காக அதிவிரைவாக 200 விக்கெட்களை (46 போட்டிகள்) கைப்பற்றிக் கொடுத்தவர் என்ற சாதனையை படைத்தார். அடுத்து 2017ஆம் ஆண்டில் அதிவிரைவாக 300 விக்கெட்களை (54 போட்டிகளில்) கைப்பற்றி இந்திய வீரராக திகழ்ந்தார்.

அதேபோல், 77 போட்டிகளில் 400 விக்கெட்களை கைப்பற்றி, அதிவிரைவாக இந்த சாதனையை படைத்த இந்தியராக இருந்தார். தற்போது, மேற்கிந்தியத் தீவுகளுக்கு எதிரான முதல் டெஸ்ட் போட்டியில் 5 விக்கெட்களை வீழ்த்தியதன் மூலம், சர்வதேச கிரிக்கெட்டில் 700 விக்கெட்களை கைப்பற்றிய மூன்றாவது இந்திய பௌலர் என்ற சாதனையை படைத்துள்ளார். அஸ்வின் தற்போது மேற்கிந்தியத் தீவுகளுக்கு எதிரான முதல் டெஸ்ட் போட்டியில், லெவன் அணியில் இடம்பெற்று விளையாடி வந்தாலும், சமீபத்தில் உலக டெஸ்ட் சாம்பியன்ஷிப் பைனலில் ரவிச்சந்திரன் அஸ்வினை சேர்க்கவில்லை. இது அப்போது கடும் விமர்சனங்களை பெற்று வந்தது. இடது கை பேட்டருக்கு எதிராக அபாரமாக செயல்படக்கூடிய அஸ்வினை, 5 இடது கை பேட்டர்கள் வைத்திருந்த ஆஸ்திரேலிய அணிக்கு எதிராக களமிறக்காதது ஏன் என பலரும் கேள்வி எழுப்பி வந்தார்கள்.

தற்போது அஸ்வின் குறித்து பத்திரிகை ஒன்றுக்குப் பேட்டிகொடுத்துள்ள பிரக்யான் ஓஜா, அஸ்வினின் வீக்னஸ் குறித்துப் பேசியுள்ளார். அதில், ''அஸ்வின் உலகத்தரமிக்க ஸ்பின்னர் என்பதில் எவ்வித சந்தேகமும் இல்லை. அவரிடம் பலவிதமாக வேரியேஷன்கள் இருக்கிறது. ஆனால், அதுதான் அவருக்கு பிரச்சினையாக இருக்கிறது. விக்கெட்டை வீழ்த்த முடியவில்லை என்றால், உடனே திட்டத்தை மாற்றி பலவிதமான வேரியேஷன்களில் பந்துவீச ஆரம்பித்துவிடுகிறார். விக்கெட்டை வீழ்த்த முடியவில்லை என்றாலும் தொடர்ந்து அதே திட்டத்தோடு கடுமையாக போராட வேண்டும். ஆனால், அஸ்வின் அப்படி செய்ய மாட்டார். மாறி மாறி வேரியேஷன்களில் பந்துவீசுவார். இதனால், அஸ்வினுக்கு அழுத்தம் ஏற்பட்டு, லைன் மற்றும் லெந்தில் கோட்டைவிட்டு விடுகிறார். இதனை மட்டும் அவர் சரிசெய்தால் போதும். இதனை சுலபமாக சரிசெய்துவிட முடியும்'' எனக் கூறினார்.