தோனி எண்ட்ரியால் அதிர்ந்த மைதானம்.. மிரட்டலான பந்துவீச்சால் சென்னை அபார வெற்றி.. | CSK vs DC Highlights IPL 2023

சென்னை சேப்பாக்கத்தில் உள்ள எம்.ஏ.சிதம்பரம் மைதானத்தில் நேற்று நடைபெற்ற [மே 10 ஆம் தேதி] ஐபிஎல் 2023 தொடரின் 55வது லீக் போட்டியில் சென்னை சூப்பர் கிங்ஸ் மற்றும் டெல்லி கேப்பிடல்ஸ் அணி மோதின. இந்த போட்டியில் டாஸ் வென்ற சென்னை அணி முதலில் பேட்டிங்கை தேர்வு செய்தது. இதையடுத்து தொடக்க வீரர்களாக ருதுராஜ் கெய்குவாட் - டெவன் கான்வே இருவரும் களமிறங்கினர். இந்த பாட்னஷிப் சிறப்பான தொடக்கத்தை கொடுக்காத நிலையில், ருதுராஜ் 24(18) ரன்களிலும், கான்வே 10(13) ரன்களிலும் தங்களது விக்கெட்டை பறிக்கொடுத்தனர்.

இவர்களை தொடர்ந்து களமிறங்கிய மொயின் அலி 7(12) ரன்னிலும், ரகானே 21(20) ரன்னிலும் ஆட்டமிழக்க, அம்பதி ராயுடு - ஷிவம் டூபே கூட்டணி பொறுப்பாக விளையாடி அணியின் ஸ்கோரை அதிகரித்தனர். அதிரடியாக விளையாடி டூபே 25(12) ரன்களில் அவுட் ஆனார். இதில் 3 சிக்ஸர்களும் அடங்கும். பின்னர், ராயுடு 23(17) ரன்களில் அவுட்டாகி ஏமாற்றம் அளித்தார். சென்னை அணி 15வது ஓவர் முடிவில் 117 ரன்களை குவித்த நிலையில், 17வது ஓவரில் எம்.எஸ்.தோனி அரங்கமே அதிர வைக்கும் அளவிற்கு மாஸ் என்ட்ரீ கொடுத்தார். 

பின்னர் இணைந்த தோனி 20(9) - ரவீந்திர ஜடேஜா 21(16) கூட்டணி அதிரடி காட்டினர். இறுதியில் சென்னை சூப்பர் கிங்ஸ் 20 ஓவர்கள் முடிவில் 8 விக்கெட்டுகள் இழப்பிற்கு 167 ரன்களை விளாசியது. 168 ரன்கள் எடுத்தால் வெற்றி இலக்கோடு டெல்லி அணியின் தொடக்க வீரர்களாக கேப்டன் வார்னர் – பில் சால்ட் இருவரும் களம்கண்டனர். இதில் வார்னர் 0(2) ரன் ஏதும் எடுக்காமல் டக் அவுட்டாகி வெளியேற, மறுபுறம் பில் சால்ட் 17(11) ரன்களில் ஆட்டமிழந்தார்.

அவர்களை தொடர்ந்து மிட்செல் மார்ஷ் 5(4) ரன்னிலும், மணீஷ் பாண்டே 27 (29) ரன்னிலும், ரிலே ரூசோவும் 35 (37) ரன்னிலும், அக்சர் பட்டேல் 21 (12) ரன்னிலும், ரிப்பல் பட்டேல் 10 (16) ரன்னிலும், லலித் யாதவ் 12 (5) ரன்னிலும் வெளியேறினர். பின்னர், ஹிக்கிம் கான் 2 ரன்களுடன் கடைசி வரை ஆட்டமிழக்காமல் களத்திலிருந்தார். இறுதியில், டெல்லி அணி 20 ஓவர்கள் முடிவில் 8 விக்கெட்டுகளை பறிகொடுத்து 140 ரன்கள் மட்டுமே எடுத்தது. 

இதன்மூலம் சென்னை அணி 27 ரன்கள் வித்தியாசத்தில் டெல்லியை வீழ்த்தி அபார வெற்றி பெற்றது. இந்த ஆட்டத்தில் ரவீந்திர ஜடேஜா ஆட்டநாயகனாக தேர்வு செய்யப்பட்டார்.