ஆஷஸ் தொடர்; கடைசி மூன்று போட்டிகளுக்கான ஆஸ்திரேலிய அணி அறிவிப்பு... நாதன் லயன் இல்லாததால் அணிக்கு பின்னடைவு...

லண்டன்: ஆஷஸ் தொடரின் கடைசி 3 போட்டிகளுக்கான ஆஸ்திரேலிய கிரிக்கெட் அணி அறிவிக்கப்பட்டுள்ளது.

5 போட்டிகள் கொண்ட ஆஷஸ் டெஸ்ட் தொடரில் பங்கேற்பதற்காக ஆஸ்திரேலிய கிரிக்கெட் அணி இங்கிலாந்தில் சுற்றுப்பயணம் மேற்கொண்டு விளையாடி வருகிறது. இதில் முதல் டெஸ்ட் போட்டியில், இங்கிலாந்தின் கைவசம் இருந்த ஆட்டத்தை சிறப்பாக விளையாடிய தன் வசப்படுத்திய ஆஸ்திரேலிய அணி வெற்றிவாகை சூடியது. இரண்டாவது டெஸ்ட் போட்டி லண்டன் லார்ட்ஸ் மைதானத்தில் கடந்த வாரம் நடைபெற்றது. இதில் முதல் இன்னிங்ஸில் ஆஸ்திரேலியா 416 ரன்களும், இரண்டாவது இன்னிங்ஸில் 279 ரன்களும் எடுத்தது.

அதேசமயம் முதல் இன்னிங்ஸில் 325 ரன்களுக்கு ஆட்டம் இழந்த இங்கிலாந்து அணி, 91 ரன்கள் பின்தங்கி இருந்த நிலையில் வெற்றி இலக்கான 371 ரன்களை துரத்தி விளையாடியது. அந்த அணியின் பென்ஸ் ஸ்டோக்ஸ் மட்டும்  155 ரன்கள் எடுத்து வெற்றிக்கு போராடிய நிலையில், மற்ற வீரர்கள் சொற்ப ரன்களில் ஆட்டம் இழந்ததால்  ஆஸ்திரேலிய அணி 43 ரன்கள் வித்தியாசத்தில் வெற்றி பெற்றது.

முதல் 2 டெஸ்ட் போட்டிகள் முடிவடைந்த நிலையில் இரண்டு போட்டிகளிலும் ஆஸ்திரேலிய அணி வெற்றி பெற்று தொடரில் 2-0 என முன்னிலையில் உள்ளது.

இதையடுத்து இவ்விரு அணிகள் இடையிலான 3வது போட்டி வரும் 6ம் தேதி தொடங்குகிறது. இந்நிலையில் எஞ்சிய 3 போட்டிகளுக்கான ஆஸ்திரேலிய அணியை அந்நாட்டு கிரிக்கெட் வாரியம் அறிவித்துள்ளது. அந்த அணியில் கடந்த டெஸ்ட் போட்டியில் காயமடைந்த நாதன் லயன் இடம் பெறவில்லை.

எஞ்சிய டெஸ்ட் தொடருக்கான ஆஸ்திரேலிய அணி விவரம்:- பேட் கம்மின்ஸ் (கேப்டன்), ஸ்காட் போலந்த், அலெக்ஸ் கேரி (விக்கெட் கீப்பர்), கேமரூன் க்ரீன், மார்கஸ் ஹாரிஸ், ஜோஷ் ஹேசில்வுட், டிராவிஸ் ஹெட், உஸ்மான் கவாஜா, மார்னஸ் லபுஸ்சாக்னே, மிட்செல் மார்ஷ், டாட் மர்பி, மைக்கேல் நசீர், ஜிம்மி பெய்ர்சன் (விக்கெட் கீப்பர்), ஸ்டீவ் ஸ்மித் (துணை கேப்டன்), மிட்செல் ஸ்டார்க், டேவிட் வார்னர்.